Kapitali 1. Aallaqqaasiut
Saqqummersitaq manna piffissanut assigiinngitsunut nuna tamakkerlugu naatsorsuutinik tunisassiornermut tunngassuteqartunik imaqarpoq. Inerniliunneqartut siulliit kisitsisinut 2004-mut tunngassuteqartut tunisassiorneq tunngavigalugu periuserineqartoq malillugu naatsorsorneqartut 2009-mi septembarimi tamanut saqqummiunneqarput. 2004-mut tabelit tamatuma kingorna nuna tamakkerlugu naatsorsuutinut inaarutaasumik kisitsisinut kisitsisaagallartunullu naatsorsueriaatsimik pilersitsinissamut atorneqarsimapput. Nuna tamakkerlugu naatsorsuutit akit ingerlaavartut aalajangersimasullu aqqutigalugit naatsorsuiffigisarnissaannut atortumik aamma pilersitsisoqarpoq. Saqqummersitap 2017-ip aallartinnerani saqqummertup tamanut saqqummersinneratigut ukioq 2010 aningaasat nalingi naleqqersuutitut atulerlugit nutarteriffigineqarpoq, siusinnerusukkullu akinut aalajangersimasunut paarlaallugu akiusimasunit kisitat ilanngunneqarput.
Akini ingerlaavartuni akinut qaffasissuseq ukiumi tassani nioqqutissanut kiffartuussinernullu atuuttoq taaniarneqarpoq. Nalilinni imminnut atasuni ukioq innersuussiffiusoq 2010 aallaavigalugu ineriartorneq takutinneqarpoq, taakkulu takuneqarsinnaalertarput ukiuni ataasiakkaani ineriartornerit ukiunut siuliinut assersuussinikkut ukiut siuliini qaninnerpaani akit ilusaat atornerisigut naatsorsuiffigineqaraangata. Akiusimasunit kisitat amerlassutsikkut ineriartornerup qaammarsaaffiginissaanut atorneqartarput, taamaalillutillu aningaasaqarnermi ineriartornivimmut takussutissaasarlutik.
2010-mut 2017-imullu kisitsisit saqqummersitami matumani takutinneqartut inaarutaasumik kisitsisaapput, kisitsisillu 2018-imut 2019-imullu tunngasut kisitsisaagallarlutik. Inaarutaasumik kisitsisinut tunngatillugu nuna tamakkerlugu naatsorsuutit nioqqutissanut kiffartuussinernullu oqimaaqatigiinnerit ersarissut aallaavigalugit naatsorsuiffigineqarput, taakkulu nioqqutissanut assersuussullugit naleqqussarneqarput, tassungalu atatillugu paasissutissanut pissarsiffiit ersarissumik suliarineqarsimallutik. Kisitsisaagallartut piffissaliinerit ataatsimoornerusut paasissutissallu takkuttut suliarilluarneqarpianngitsut aallaavigalugit pilersinneqarput, taakkualu paasissutissanut atortunut ikinnerusunik piumasaqaatitaqarput, kisitsisillu sukkanerusumik tamanut saqqummiunneqartarnissaannik qulakkeerinnillutik.
Tamanut saqqummiussineq manna aqqutigalugu kisitsisaagallartunut nutaamik naatsorsuinerit arlallit atorneqalersimammata erseqqissarneqassaaq, taakkulu 2019-imi novembarimi tamanut saqqummiunneqarput.
Kapitali 6 tabelinik 10-nik imaqarpoq. Tabelit kisitsisinik kapitali 2-mi 5-imilu saqqummiussinermi atorneqartunik tamanik imaqarput.
Naatsorsueqqissaartarfiup kisitsisaataasiviani tabelit tamarmik piffissamut 2003-miit 2019-imut tunngassutillit kapitalimilu 6-imi nassaassaasut aamma takoqqinneqarsinnaapput.
Paasissutissat periutsillu erseqqissumik allaaserinerat takorusunneqarpata siusinnerusukkut saqqummersitaq "Nuna tamakkerlugu naatsorsuutit 2003-2010" Naatsorsueqqissaartarfimmit 2011-mi decembarimi saqqummersinneqartoq innersuussutigineqassaaq.